係觀塘區返工有時唔知食咩好，或者想食得特別d同豪d，大家不妨試下呢間 “萌 MOE by Nishimura”。地點位於新開冇耐嘅中海日升中心1樓。
唔知係新開定價錢關係，午餐時間有好多位，所以都唔洗排隊就可以直接入去食啦!
下面係佢地嘅Lunch Menu，叫套餐食會比較化算，份量亦都夠飽，可能大食嘅朋友就會差d啦，不過唔夠食都重可以單點其他肉類，所以都唔洗怕話唔夠飽啦，哈哈!
今次我就試左佢地嘅$168商務套餐，套餐入面包左前菜，牛丼，湯，甜品，牛肋肉，一口牛，腹協肉，上肩肉，但係就冇包到飲品。
諗好左食咩梗係要落order啦，呢間餐都好似國內”海底撈”咁可以用平板電腦落order嘅，當然都可以叫職員幫你寫單啦。
落完order唔洗等好耐d食物就已經送黎啦，可能因為唔係太多人嘅關係。
一開始係黎左個湯同個牛丼先，個牛丼上面有隻接近全生嘅蛋，將隻蛋同d飯撈埋一起，咁d飯就變到好滑好好味嫁啦。
好快，我最期待嘅肉類都送到黎啦，重有3款汁可以比你點黎食，我最鍾意係有少少辣個款汁(最右邊)，食落好野味。
肉類我就覺得中間個款最好食，但係我唔知係咩部位，腹協肉？上肩肉？一口牛我覺得就最唔好食啦。
大家燒肉食個陣記得要將d肉放邊位黎燒呀，咁樣就冇咁容易燒到變成碳啦，如果個火太大大家都可以叫靚女職員幫你地較返細個火嫁。
最後就係甜品啦，如果你係同我一樣叫商務套餐就可以有一球雪糕球，原本我地3個人只係得兩個人叫左商務套餐，另一個叫左定食，所以只得兩球雪糕，不過職員哥哥好好人，送埋比我地，咁最後我地每人都可以食到一球啦。
咁等我講下個雪糕先啦，我自己就係叫左抹茶味，食落係好重抹茶味同埋有少少牛奶味，如果大家係好鍾意食抹茶味嘅雪糕我相信你地會好鍾意，因為都幾重抹茶味，不過我自己就一般般啦。我朋友就叫左雲呢拿味，味道就冇咩特別，都係雲呢拿加牛奶味，不過我個人就鍾意雲呢拿味多過抹茶味啦。
萌 MOE by Nishimura
地址: 觀塘駿業街56號中海日昇中心1樓A號舖
Shop A, 1/F, COS Centre, 56 Tsuen Yip Street, Kwun Tong
港鐵觀塘站 A1 出口, 步行約6分鐘
電話號碼: 3974 5138
營業時間: 星期一至日: 12:00-23:00
