Day 1 2016/7/1 HK Express 出發+The Nap Patong酒店+不知名意大利餐廳
由於6月30重要返工嘅關係，我地只好坐HKExpress零晨機出發，原本預去到布吉係零晨2點，咁係機場附近平平地訓一晚，第二朝起身就租車入芭東。點知計劃趕唔上變化，出發前兩個星期收到HKEpress嘅email話布吉機場個邊因跑道關閉，所以班機要遲起飛，變成去到布吉係早上7點，oh my god，咁我第一晚酒店未曬左？好彩第一晚我只係預平平地訓一覺，咁唔理啦，去到布吉照去酒店訓返幾個鐘先，之後先去租車。
可以係機上面睇埋日出=.=
起身後我地就去返機場入面搵Thai Rent a Car拎車，之前已經係網上BOOK左，4500THB租5日，好平，大家記得要網上BOOK左先，因為去到先租會冇曬車，登記個時已經見好多人問重有冇車，同埋網上BOOK係平d。登記個時Thai Rent a Car會用你張信用卡hold起10000THB limit，之後還車冇事就會release返出黎。
圖片來源: The Nap Patong
租完車我地就揸去我地真正第一晚住嘅酒店到啦 – The Nap Patong，呢間係一間4星級嘅酒店，位於芭東區，位置十分方便，去食野飲野行10分鐘已經好多選擇。呢間酒店嘅minibar係免費嘅，汽水免費每日refill，員工服務亦都十分好。
房都好夠大，唔會話開左行李就冇曬位。因為我係Agoda特價先BOOK佢地，所以景觀只係城景，如果大家想睇泳池景就要自己加錢升級啦。
Local tour地址係Thawewong Rd, Patong, Phuket
放低曬行李之後我地就出左去搵野食同搵local tour啦，一出到酒店門口就已經有一間local tour啦，見到梗係入去格格價先啦，最後我地報左圖中呢一間，因為好平~~係好平~~我地報左兩個tour，一個係出帝皇島+珊瑚島900THB，一個就係激流+ATV 30mins+其他雜項(滑索一次、睇monkey、fish spa、自助午餐) 1,100THB，因為我地有人想玩海底漫步，所以加左1,000THB，去到先到要加1,600THB，所以想玩嘅朋友建議報tour個時報埋，咁total就兩個tour 2,000THB+海底漫步1,000THB=3,000THB。
報完tour就走左去搵野食啦，行行下見到有條內街好多野食，咁就走左入去食野啦，不過我地都係去食左隻雞脾同飲左杯野就走左lu。
食完雞脾我地就諗住行去酒吧街睇睇，其間見到一d內街有野行都會走入去睇下，不過都冇咩收獲。
之後我地就行左去Thanon Bangla呢條酒吧街，因為去到都重未入夜，所以都唔係太多人，我地決定去做個泰式按摩先，等到夜晚先再黎過。
按完摩好鬼肚餓，梗係啦，食隻雞脾邊夠飽。咁我地就去左按摩店附近一間意大利餐廳食野啦，餐廳係一個意大利人開嘅我諗d食物應該都唔太差瓜。
我地叫左4款食物，最難食係左下角個果墨汁寬條麵，因為好多沙~~其他個d都OK幾好味。食完野就返左去酒吧街行左陣飲左幾支啤酒就返酒店訓lu，第一日唔多夠訓，咁早機，所以要早d返去訓，雖然都飲到2-3點，哈~
Day 1 完~
Day 2 2016/7/2 Raya Restaurant咖哩蟹+泰式宵夜
由於前一晚飲完野返到酒店沖埋涼都成4點先訓，所以我地全部都訓到黃朝百晏，哈~
起身梳洗好我地就諗住去布吉鎮食咖哩蟹，我地揸車過到去都開始天黑了，由芭東揸車過去大約35-40mins。
Raya Restaurant門口合照一張
餐廳擺設裝修都係變為懷舊，同埋入面係冇冷氣嫁~
我地一共叫左3個餸1個湯加4大碗飯。
先講講呢個咖哩蟹，佢地係會幫你起曬肉先，之後就可以啖啖肉咁食，雖然唔係好多肉，不過咁樣又好似冇左咖哩蟹個果風味，佢地咖哩係比較香個d，重椰奶味，少少辣。另外，佢地會有碟粉絲咁嘅野比埋你，比你用黎點咖哩汁食。總括黎講不推薦，都係建議大家食返傳統個款。
呢個如果我冇記錯就係薑黃炸雞，好乾冇咩薑黃味千其唔好叫，雖然有個汁比你點，但係都係唔好味，超級不推薦。
炒魷魚，呢個辣辣地都OK野味，想食可以試試。
最後一個就係肉丸湯，呢個就冇咩好講，冇咩特別。
整體黎講呢間野一般般，如非順路或特別想試可以唔黎都得。
食完野走左去周圍行下，幫助消化~
行到冇聊就玩下兩個傻仔啦~ 小心25秒大笑聲~
其實個到都冇咩野好行，好快我地就揸返車返酒店lu。
跟住我地就去左按摩啦~ 我地都係去街邊是但搵一間就入去嫁啦~
按完摩我地又走左去食宵夜啦，不過今次就食泰式宵夜。
今餐宵夜叫左5樣野，有蟹肉炒飯? 好似係，泰式炒河，一個牛肉湯河，炸雞翼同埋一個好似金沙骨嘅物體。
整體黎講都算好食，係個果牛肉湯河一般般，我覺得香料放太多，全部都係香料味。
食完就返左酒店樓下間便利店買杯麵用黎做第二日早餐，因為我地報左tour，所以要好早起身怕冇時間出去食早餐。
Day 2 完~
