朋友約食飯小聚，約左係呢間位於觀塘嘅“翔龍拉麵小籠包”。我地一行5人約左6點半，因為冇BOOK位，原本以為要等位，點知去到唔洗等，直接就入得去。

坐好左之後，佢地會有茶送上，重有兩份menu比你睇。

呢d係佢地嘅必食推介，我地有叫到佢地推介嘅小籠包同大盤雞。另外我地重有叫左蒜泥白肉、北京烤鴨、水煮魚同一碟菜。5個人食應該差不多啦。

蒜泥白肉我地食左大半先醒起唔記得影相，哈! 最後兩塊補影返。佢地嘅蒜泥白肉係會有塊青瓜片夾係中間，食個時係一塊白肉一塊青瓜夾埋一齊食，咁樣食就會比較清新d，唔會好肥膩。

第二樣到小籠包啦，味道唔錯，同我係超市買個d翔龍小籠包差不多味，不過就係升級版，皮薄好多，同多好多肉汁。

北京烤鴨到，上之前佢會問你要唔要影相，如果唔洗佢就拎去佢就手嘅地方幫你切好再上碟。

除左切好嘅鴨，佢重會有皮啦，蔥、青瓜同醬提供比你包住呢食，老實講味道好覺得好一般，如非特別愛好可以唔洗試。

再黎就係水煮魚啦，呢個水煮魚味道唔錯，幾好食，不過我就略為覺得唔夠辣啦，再辣d會重好食。

之後就到大盤雞，呢個好一般，係雞加薯仔炆，唯一一樣食唔曬嘅就係呢味餸，大家可以唔洗試。

呢個菜唔錯，幾清甜，唔想全都食肉可以叫個菜都唔錯。

總括黎講都算可以中規中矩啦，價錢就每人食左200，都唔算太貴。下次食可以叫返上海野，水餃呀個d應該都唔錯。